ஆசிய மற்றும் மத்திய கிழக்கு சந்தைகளுக்கான பிராந்திய விரிவாக்கத் திட்டங்களுடன் D P Logistics நிறுவனம் ‘David Pieris Logistics’ என பெயர் மாற்றம்

டேவிட் பீரிஸ் குழுமத்தின் பொருட்கள் கையாளல் (Logistics) துறையின் தொடர்ச்சியான வளர்ச்சி மற்றும் ஒருங்கிணைப்பில் ஒரு முக்கிய மைல்கல்லாக, ‘D P Logistics (Private) Limited’ நிறுவனம் தனது பெயரை உத்தியோகபூர்வமாக ‘David Pieris Logistics (Private) Limited’ (DPL) என மாற்றியுள்ளதை மகிழ்ச்சியுடன் அறிவிப்பதாக அக்குழுமம் தெரிவித்துள்ளது.

இந்த பெயர் மாற்றமானது, டேவிட் பீரிஸ் குழுமத்தின் வர்த்தகநாமத்தின் கீழ் நிறுவனத்தின் பலப்படுத்தப்பட்ட அடையாளத்தையும், உள்நாட்டிலும் வெளிநாடுகளிலும் ஒரு முன்னணி முழுமையான லொஜிஸ்டிக்ஸ் மற்றும் விநியோகச் சங்கிலித் தீர்வு வழங்குநராக அதன் முன்னேற்றத்தையும் பிரதிபலிக்கிறது.

David Pieris Logistics நிறுவனம் களஞ்சியப்படுத்துதல் (warehousing) மற்றும் மூன்றாம் தரப்பு லொஜிஸ்டிக்ஸ் (3PL) செயற்பாடுகளில் தற்போது நாட்டில் முதல் பத்து நிறுவனங்களுக்குள் தரவரிசைப்படுத்தப்பட்டுள்ளதுடன், உள்ளூர் லொஜிஸ்டிக்ஸ் துறையில் மிகப் பாரிய கொள்கலன் தொகுதிகள் பிரிவையும் நிர்வகித்து வருகிறது. சரக்கு அனுப்பும் சந்தையில் நிறுவனம் தனது சந்தைப் பங்கை தொடர்ச்சியாக அதிகரித்து, அனைத்து லொஜிஸ்டிக்ஸ் பிரிவுகளிலும் விரிவான நிபுணத்துவத்தைக் கொண்ட உள்ளூர் லொஜிஸ்டிக்ஸ் வழங்குநர்களில் ஒன்றாக தனது பெயரை வலுப்படுத்தியுள்ளது.

அதன் விரிவாக்க மூலோபாய நடவடிக்கையின் ஒரு அங்கமாக, 2022 ஆம் ஆண்டில், Expolanka Holdings PLC நிறுவனத்தின் கப்பல் போக்குவரத்துப் பிரிவாக இருந்த Pulsar Shipping Agencies (Pvt.) Limited நிறுவனத்தை டேவிட் பீரிஸ் குழுமமானது கையகப்படுத்தியது. இக்கையகப்படுத்தலானது, கப்பல் முகவர் சேவைகள், கப்பல் முகாமைத்துவ சேவைகள் மற்றும் கடல்சார் லொஜிஸ்டிக்ஸ் ஆகியவற்றிற்கு விரிவுபடுத்துவதன் மூலம் குழுமத்தின் லொஜிஸ்டிக்ஸ் மற்றும் கப்பல் போக்குவரத்துப் பிரிவை வலுப்படுத்தவும், அதன் சேவைத் திறன்களை மேலும் விரிவுபடுத்தவும் உதவியது.

இந்த மூலோபாய ஒருங்கிணைப்புகள் மூலம், David Pieris Logistics நிறுவனம் தற்போது கொள்கலன் போக்குவரத்து, விநியோகம் மற்றும் திட்டங்களுக்கான லொஜிஸ்டிக்ஸ் (project logistics), சரக்கு அனுப்புதல், சுங்க அனுமதி (clearance), மூன்றாம் தரப்பு லொஜிஸ்டிக்ஸ் (3PL), களஞ்சியப்படுத்தல், விநியோகச் சங்கிலி முகாமைத்துவம் உள்ளிட்ட அது தொடர்பான அனைத்து சேவைகளையும் வழங்குகிறது.

தனது சர்வதேச தடம் பதித்தலை மேலும் வலுப்படுத்தும் நோக்கில், டேவிட் பீரிஸ் குழுமமானது துபாயை தளமாகக் கொண்ட புகழ்பெற்ற லொஜிஸ்டிக்ஸ் நிறுவனமான Navire Logistics Services LLC மற்றும் ஓமான் தலைநகர் மஸ்கட் மற்றும் சலாலாவில் உள்ள அந்நிறுவனத்திற்கு முழுமையாக சொந்தமான துணை நிறுவனங்களில் 50% பங்குகளைக் கையகப்படுத்தியுள்ளது. Navire Logistics Services LLC நிறுவனம் சவூதி அரேபியாவின் ஜித்தாவிலும் கூட்டு முயற்சியுடனான நிறுவனமொன்றை நிறுவியுள்ளது. இந்த மூலோபாய ரீதியான முதலீடானது இலங்கைக்கு அப்பால் குழுமத்தின் விரிவாக்கத்தில் ஒரு முக்கிய மைல்கல்லாக அமைவதுடன், சர்வதேச மற்றும் பிராந்திய லொஜிஸ்டிக்ஸ் சந்தைகளில் வலுவான பங்களிப்பிற்காக அதை நிலைநிறுத்துகிறது.

இந்த முன்னேற்ற நடவடிக்கைகளுடன், வலுவான உள்ளூர் திறனை, அதிகரித்து வரும் உலகளாவிய ரீதியிலான அணுகலுடன் ஒருங்கிணைத்து, திறமையான, முழுமையான விநியோகச் சங்கிலித் தீர்வுகளுக்கான எழுந்து வரும் கேள்வியை பூர்த்தி செய்யக்கூடிய ஒரு முழுமையான ஒருங்கிணைந்த லொஜிஸ்டிக்ஸ் நிறுவனமாக David Pieris Logistics நிறுவனம் தொடர்ச்சியாக பரிணமித்து வருகிறது.

தற்போது இலங்கை, பங்களாதேஷ் உள்ளிட்ட ஏனைய புதிய பிராந்தியங்களில் கப்பல் போக்குவரத்து மற்றும் லொஜிஸ்டிக்ஸ் துறையில் புதிய கூட்டு நிறுவனங்களை அமைப்பதன் மூலம் மேலும் பல விரிவாக்கப் பணிகள் முன்னெடுக்கப்பட்டு வருகின்றன.