වරුන් බෙවරේජස් ලංකා පුද්ගලික සමාගම ශාන්ත සෙබස්තියන් විද්‍යාලයේදී ලෝක පරිසර දිනය උත්සවය සංවිධානය කරමින් පරිසර සුරක්ෂිතතාවය පිළිබඳ අවබෝධය වර්ධනය කිරීම සහ සිසුන් අතර තිරසාර ප්ලාස්ටික් භාවිතය ප්‍රවර්ධනය කිරීම සඳහා ක්‍රියාකාරකම් මාලාවක් ක්‍රියාත්මක කළේය. මෙම උත්සවය, සමාගමේ පාරිසරික, සමාජීය සහ පාලනය (ESG) අරමුණු යටතේ පරිසර සුරක්ෂිතතාවය හා ප්ලාස්ටික් අපද්‍රව්‍ය කළමනාකරණය පිළිබඳ දිගුකාලීන කැපවීමට අනුකූල වේ.
උත්සවයේදී, ප්ලාස්ටික් භාවිතය සම්බන්ධයෙන් තිරසාර සහ වගකීමෙන් පිරුණු ක්‍රම පිළිබඳ අධ්‍යාපනික සැසි පැවැත්වුණි. මෙම වසරේ ලෝක පරිසර දිනයේ ප්‍රධාන තේමාව වන “ප්ලාස්ටික් දූෂණය අඩු කරමු” යන අදහසට අනුකූලව, තිරසාර ප්ලාස්ටික් භාවිතයේ වැදගත්කම විශේෂයෙන් අවධාරණය කරන ලදි. සිසුන්ගේ නිර්මාණශීලීත්වය දියුණු කිරීම සඳහා, පරිසර සංරක්ෂණය සහ වගකීමෙන් පිරුණු ප්ලාස්ටික් භාවිතය පිළිබඳ ඔවුන්ගේ අදහස් ප්‍රකාශ කිරීමට අවස්ථාව සපයන චිත්‍ර තරඟයක් සංවිධානය කරන ලදී.
වරුන් බෙවරේජස් ලංකා සමාගමේ නීති අනුකූලතා හා තිරසාර ප්‍රධානී එරේෂා කුඹුරුලන්ද මහත්මිය, PET ප්ලාස්ටික් එකතු කිරීම සහ ප්‍රතිචක්‍රීකරණ ක්‍රියාවලීන් වැඩි දියුණු කිරීම සඳහා සමාගම දක්වන කැපවීම පිළිබඳව අවධාරණය කළාය. ඇය පැවසුවේ, “වරුන් බෙවරේජස් ලංකා සමාගම ලෙස අපි PET ප්ලාස්ටික් වටිනා සම්පතක් ලෙස පිළිගෙන එය වගකීමෙන් කළමනාකරණය කළ යුතු බව හඳුනා ගත්තා. ‘පිරිසිදු හරිත ශ්‍රී ලංකාවක්’ වැඩසටහන ඇතුළත් අපගේ උත්සාහයන් මඟින් ශාන්ත සෙබස්තියන් විද්‍යාලය වැනි ප්‍රජා සහ ආයතන PET ප්ලාස්ටික් බෝතල් එකතු කිරීම සහ ප්‍රතිචක්‍රීකරණය කිරීම සඳහා සක්‍රීයව සහභාගී කර ගන්නවා. මෙම වැඩසටහනේ කොටසක් ලෙස, අපි ‘Home to School’ ව්‍යාපෘතියක් ක්‍රියාත්මක කරමින්, විවිධ දිස්ත්‍රික්කවල සිසුන් සහ ඔවුන්ගේ පවුල් සම්බන්ධ කර ගනිමින් වගකිවයුතු ප්ලාස්ටික් අපද්‍රව්‍ය කළමනාකරණය පිළිබඳ දැනුවත් කර දිරිමත් කරනවා. මේ තුලින් ප්ලාස්ටික් එකතු කිරීමේ යටිතල පහසුකම් වැඩි දියුණු කිරීම සහ දැනුවත් කිරීම මඟින් අපි ප්‍රතිචක්‍රීකරණ අනුපාතය සැලකිය යුතු ලෙස වැඩි කිරීමට අපේක්ෂා කරනවා. මෙම ප්‍රවේශය පරිසර තිරසාරත්වයට පමණක් නොව, අපගේ පරිසරයේ අනාගතයේ රැකවරණය කරන තරුණ පරපුර අතර වගකීමේ සංස්කෘතියක් ගොඩනැගීමටද උපකාරී වේ.” යැයි ඇය ප්‍රකාශ කළාය.
මෙම උත්සවයේ කොටසක් ලෙස, ප්ලාස්ටික් අපද්‍රව්‍ය වර්ගීකරණය සහ එකතු කිරීම පහසු කර ගැනීම සඳහා නව ප්ලාස්ටික් එකතු කිරීමේ බඳුන් ස්ථාපනය කරමින් සිසුන්ට නිසි ලෙස PET ප්ලාස්ටික් බැහැර කිරීමට අවස්ථාව සලසා දුණි. චිත්‍ර තරඟය මඟින් සිසුන්ට පරිසර ආරක්ෂාව සහ වගකීමෙන් පිරුණු ප්ලාස්ටික් භාවිතය පිළිබඳ ඔවුන්ගේ කැපවීම නිර්මාණශීලීව ප්‍රකාශ කිරීමට වේදිකාවක් සපයන ලදී. තේමාවට අනුකූලව සහ මහජන අවබෝධය වැඩි දියුණු කිරීම සඳහා, සිසුන් සහ පාසල් පරිසර කමිටු සාමාජිකයින් සඳහා ආරාධිත දේශන දෙකක් පැවැත්වූ අතර, පාසල් පරිශ්‍රයේ පොල් ගස් වගා කිරීමද සිදු කරන ලදී.
ශාන්ත සෙබස්තියන් විද්‍යාලයේ පැවැත්වූ මෙම ජාත්‍යන්තර පරිසර දින උත්සවය, වරුන් බෙවරේජස් ලංකා සමාගමේ පරිසර අධ්‍යාපනය, තිරසාර අපද්‍රව්‍ය කළමනාකරණය සහ ප්‍රජා බලගැන්වීම පිළිබඳ අඛණ්ඩ කැපවීමේ සාක්ෂියකි. මෙය ශ්‍රී ලංකාවේ හරිත ව්‍යාපෘතිවල නායකත්වය දැක්වීමේ ඔවුන්ගේ භූමිකාව තවත් ශක්තිමත් කරයි.